ANA FRANK, INOLVIDABLE...

      A lectura da novela gráfica na que se recolle a vida de Ana Frank ocupounos parte deste trimestre. Empezamos hai uns días as tertulias sobre o libro e, para ir entrando en materia, vimos e comentamos este vídeo. A ver que vos parece...

http://www.annefrank.org/es/Ana-Frank/La-historia-de-Ana-Frank-en-version-abreviada/

      Evidentemente ninguén cun mínimo de sensibilidade pode quedar impasible despois da lectura das vivencias desta familia que representa a todos os xudeus que sufriron a irracional persecución por parte de Hitler e os que o apoiaban. O libro resultounos fácil de ler, pois a novela gráfica fai máis levadeiro o coñecemento dos datos históricos que rodean á historia e, ademáis, axuda a "ver" mellor o horror do encerro e do castigo nos campos de concentración. Desde logo, todos deberíamos coñecer esta historia, sobre todo para que non volva a repetirse... E tamén para ver a dónde pode chegar o fanatismo, a soberbia e os prexuízos cara os que son diferentes, pero non peores nen mellores...  

     Para rematar, deixámosvos un pequeno vídeo elaborado por Elena Naveira, unha das lectoras do libro. 

SEMPRE ANA FRANK...

   

     Os fendetestas de 3º e 4º de ESO acabamos xa as tertulias entorno a Ana Frank. La biografía gráfica. Certo é que nos deu moito de que falar, non só polo que presenta de contido histórico senón tamén polo que ofrece a obra desde o punto de vista humano e moral.

      O primeiro que queremos destacar é que trata sobre unha realidade, recreada no mundo da literatura e do cinema,  que non se debe volver a repetir. O drama de Ana Frank mostranos a maldade e as inxustizas que pode cometer o ser humano: temos que pensar que Ana Frank podíamos ser todos.

      Nos comentarios da obra falamos tamén das consecuencias das guerras, da intolerancia con relixións e culturas diferentes e tamén do valor da familia e do cariño cando as cousas van moi mal. Por certo, tamén foron xurdindo referencias ao significado e orixe de  palabras que non eran habituais para nós: sinagoga, pogromo, holocausto...

       Recomendámosvos esta fermosa novela gráfica  a todos os que considerades a sensibilidade, o respecto, a tolerancia e a necesidade de saber como pezas fundamentais na engranaxe  dun mundo mellor.

            Finalmente, deixámosvos aquí o enlace á versión cinematográfica da obra.

http://youtu.be/K9K4BpnWDTo