Os lectores e lectoras do IES de Curtis son cada vez máis numerosos. Este curso superamos amplamente os cen participantes, Seguimos a contar coa participación de diferentes departamentos ( Historia, Inglés, Orientación, Lingua Castelá, Lingua Galega, Portugués e Automoción) e damos continuidade ao proxecto iniciado o curso anterior coa introdución do grupo de adultos. Dámoslles a benvida a todos e todas!
Compartimos fotografía da reunión inicial con parte do alumnado.
Iniciamos curso con moitas novidades. Dámoslle a benvida a dous clubs temáticos centrados no misterio e no amor romántico e incorporamos como lectores alumnado de Ciclos.
As historias de intriga son un clásico nas escollas das lecturas de calquera club e nós non somos a excepción. Cada ano tentamos incrementar, variar a oferta de lecturas que nos arrepían e complementalas con actividades. Este curso iremos un paso máis coa nova sección do club para frikis do misterio. Respecto á temática romántica imos ler obras nas que aparece un concepto de amor diferente do tradicional. Fuxiremos de estereotipos machistas e de relacións tóxicas. Outra novidade moi celebrada é a incorporación á aventura colectiva da lectura de alumnado de Ciclos Formativos, concretamente da rama de Automoción.
Cada ano somos máis (case non cabemos na foto da reunión inicial!). Boas e proveitosas lecturas a todos e todas!
Iniciamos este curso tan especial con moitas ganas de compartir vivencias e experiencias. O noso club vai medrando ano a ano coa incorporación de novos integrantes que declaran sen complexos ser afeccionados á lectura. Este ano somos case 56 alumnos e 7 profesoras !!!!
A xuntanza inicial, que adoitabamos realizar de maneira conxunta e masiva, tivo que adaptarse ás circunstancias nas que vivimos marcadas pola Covid. Para gardar a distancia social, que tanto nos condiciona e protexe nestes tempos tan especiais, vímonos obrigados a celebrar a reunión por fases en diferentes días. O mesmo aconteceu coa nosa tradicional foto conxunta que realizamos cos grupos acompañados de cadansúa profesora.
De todos os xeitos, queremos deixar
ben claro que estas atípicas circunstancias non van diminuír as nosas ganas de
mergullarnos na maxia da lectura. Ademais estamos habilitando un novo espazo
que cumpra con todas as medidas de seguridade celebrar as reunións.
Aquí vos deixamos a galería de fotos da reunión inicial. Boas e proveitosas lecturas a todos e todas!
