COMETAS EN EL CIELO

 

Cometas en el cielo relata a historia de dous pais e dous fillos, da súa amizade e de como o destino xoga as súas cartas na historia das súas vidas. Ambientada en Kabul (Afganistán), unha cidade dominada pola tradición e costumes ancestrais, en pleno conflito bélico, sitúase a historia de dous rapaces de diferente clase social: Amir e Hassan.

Amir (un rapaz da etnia pasthún, clase acomodada que domina a política e a economía de Afganistán) é o narrador da historia. Fillo dun home cunha situación privilexiada en Kabul, soña con ser escritor. A pesar de contar con todos os luxos, non é feliz debido á falta de cariño paternal e refúxiase no afecto do seu mellor amigo, Hassan. Este é un rapaz da etnia hazara, un grupo considerado de clase inferior, mais a pesar diso é o único amigo de Amir e tamén  o seu medio irmán. Hassan defende e protexe a Amir en todo momento; ademais é un neno valente, intelixente e xeneroso que sofre o racismo e o desprezo por ser hazara. Para impresionar a seu pai, Amir, tenta a toda costa gañar a competición anual de cometas, aínda que sexa co risco de poñer en perigo a amizade de  Hassan que é o seu servente e compañeiro de xogos dende a infancia.

Tras vinte anos nos Estados Unidos, unha chamada telefónica  fai que Amir regrese a un novo Afganistán dominado polo réxime talibán. Tantos anos despois Amir tratará de poñerse en paz co seu pasado. A historia sucédese nun contexto que vai entre a caída da ditadura de Afganistán, a subida dos talibáns ao poder e a emigración dos refuxiados cara aos Estados Unidos.

Foron moitos os temas tratados a raíz da lectura deste libro. Podemos sintetizar os máis relevantes:

• Os réximes totalitarios e as súas inxustizas
• O abuso do poder
• As desigualdades sociais e culturais
• A amizade
• O maltrato psicolóxico
• As carencias afectivas
• As familias desestruturadas
• A importancia da motivación na vida

• A capacidade de perdoar e emendar os erros do pasado
• As migracións forzosas, a problemáticas dos refuxiados e os efectos das guerras.
• O papel das mulleres nestas sociedades.

Rematamos cunhas breves valoración dos lectores e lectoras que ofrecen unhas pingas a xeito de mostra do compoñente emotivo que esta lectura lles achegou.

 

Ariadna Fernández:

É unha maneira  moi  interesante de coñecer un pouco mellor a historia do mundo no que vivimos.

 

María Conde:

Trátase dun libro que contén moito sentimento e que achega valores ao lector. Ademais, axúdanos a coñecer dende cerca temas como o mal da guerra ou as diferenzas sociais.

 

Anxela Roca:

Amir recorda unha serie de traumas vividos en Afganistán cando era un neno.

 

Nuno Couso:

Cometas en el cielo narra a amizade de Amir, rapaz cunha acomodada posición social, e Hassan, o seu criado de clase inferior. Esta diferenza de clases non lles impide quererse e entenderse de maneira incondicional.

COMETAS EN EL CIELO: PARA LER E VER

         Hai xa dúas semanas rematamos a lectura de Cometas en el cielo, de Khaled Hosseini. Nesta ocasión manexamos a versión gráfica, ilustrada por Fabio Celoni e Mirka Andolfo. Antes de reunirnos para comentar a obra, tivemos a oportunidade de ver a película que no 2007 dirixiu Marc Foster partindo da novela. Non nos defraudou en absoluto: poucas veces a versión fílmica respecta tan ben a historia orixinal. 

         Tanto a novela gráfica como a versión cinematográfica déronnos pé a comentar diferentes aspectos de interese:

- O mundo afgano non é o mellor lugar para unha muller: na primeira parte da película, que reflexa unha época de apertura social e política as mulleres con un estilo occidental e teñen certas liberdades. Na segunda parte, isto cambia radicalmente co réxime talibán, o cal obriga ó uso da burka e permite a lapidación, entre outras atrocidades. Afanistán é un país que involucionou e segue a involucionar co tempo. Como pode estar a pasar isto en pleno século XXI??

- A variedade de pobos afganos e a súa distinta orixe: Hassam é un zahara, é o fillo do criado da familia de Amir Jam. Aínda que inicialmente o considera o seu amigo, despois a amizade rómpese por un feito gravísimo. Na vida cotiá Hassam traballa na casa de Amir Jan, de feito é el quen lle pon o almorzo na mesa.

- Cometas en el cielo fainos reflexionar sobre a gravidade da covardía e a mentira que poden traizoar unha relación de confianza e amizade. Amir Jam comete un grave erro pero ao medrar e madurar consegue enmendalo. Este é un bo exemplo dun personaxe redondo. A dignidade do pai é tamén un tema destacado porque nos mostra que é unha persoa de principios que busca non facer dano a ninguén, é un personaxe moi humano.

     Recomendámosvos esta novela e a súa versión cinematrográfica, xa que nos trasmiten valores necesarios para vivir de xeito correcto en calquer parte do mundo. E recórdannos que non en todos os lugares do mundo se vive como aquí... Se a nós nos queda aínda moito polo que loitar para conseguir unha sociedade mellor, imaxinade o difícil que é vivir nos países coma Afganistán...