XI XORNADA DOS CLUBS DE LECTURA

      Un ano máis o Club de Lectura Fendetestas estivo presente na undécima edición das Xornadas que reuniron en Compostela aos  coordinadores  dos 231 Clubs  espallados pola xeografía galega.

      O día  comezou coa entrega  do premio de Clubs de Lectura 2018 a Carlos Negro, como recoñecemento por ter sido o autor galego más lido polas lectoras e lectores  no pasado curso escolar. O autor de Makinaria, Penúltimas tendencias e Masculino singular reivindicou a importancia da poesía nos clubs de lectura  facendo fincapé na presenza desta nos elementos máis cotiás.  Tamén destacou o papel fundamental que desempeñan as bibliotecas  na dinamización dos centros de ensino e da sociedade en xeral, e como estas deixaron de ser meros almacéns de libros para converterse en viveiros de creatividade. 

     

      A seguinte actividade foi unha mesa temática relacionada coas estratexias para a selección de textos. Resultou moi interesante e enriquecedor coñecer  a experiencia doutros grupos de dinamización  en canto  a lecturas, propostas de organización, itinerarios temáticos...Posteriormente  Freddy Gonçalves compartiu cos asistentes a súa experiencia como promotor da lectura ofrecendo  ideas e suxestións de actividades para desenvolver nos clubs.

     Na sesión da tarde a oferta de actividades diversificouse en diferentes obradoiros e propostas temáticas diversas. No Club de lectura Fendetestas optamos por asistir ao taller Proxecto Eva conducido por Freddy Gonçalves, onde tivemos que construír unha sociedade ideal despois dunha catástrofe mundial. As referencias a coñecidas distopías literarias como O conto da criada ou Os xogos da fame foron as bases desta interesante proposta.

     Rematamos a tarde co achegamento de Dores Vilavedra sobre a necesidade de realizar unha selección meditada das suxestións lectoras e unha proposta de textos pouco convencionais. A clausura correu a cargo do polifacético Xurxo Souto que, coa posta en escena baseada na súa obra  Contos no mar de Irlanda, constatou unha vez máis a idea de que a literatura non só está nos libros.

PALABRAS ENVELENADAS

      Este libro  de Maite Carranza conta a historia da estraña desaparición dunha rapaza  de quince anos chamada Bárbara Molina. Unha chamada a un móbil catro anos despois   provoca un fío de esperanza na súa desesperada nai e pon en marcha un novo xiro na investigación. Tamén resultan especialmente relevantes o personaxe do pai e  o dunha amiga  que se sente traizoada. O encargado do caso é  un policía que está a punto de xubilarse e que se implicará dun xeito moi persoal na misteriosa desaparición.  A  trama do libro desenvólvese nunhas  trepidantes vinte e   catro horas nas que se conseguen desentrañar as escuras claves que agocha o misterio. Aínda que non imos desvelar o final, non podemos evitar mencionar que resulta tremendamente sorprendente.

     

       Nas sesións mantidas para falar deste libro os Fendetestas de 2º ESO comentamos o desacougante que nos pareceu o libro. Relacionamos a temática con casos da actualidade como a desaparición de Diana Quer ou doutras rapazas e falamos das terribles situacións que algunhas persoas teñen que soportar: abusos, violacións, maltrato... Comentamos a importancia de denunciar estes delitos e a necesidade de que a sociedade se conciencie da importancia dos mesmos.  Tamén falamos da relación entre os pais de Bárbara que nos pareceu  moi complicada e con actitudes moi machistas. A conexión entre os comportamentos machistas e as agresións que comentamos antes é evidente. 

        Respecto á narración en  concreto todos estivemos de acordo en que  o libro tiña un ritmo trepidante que conseguía “enganchar” moi facilmente. O que máis nos gustou foi que finalmente conseguisen atopar a Bárbara con vida e o que menos a triste  e tremenda historia que explicaba a desaparición da rapaza. Respecto á técnica de narración  o uso dos saltos no tempo e a capacidade que ten a autora para manter o fío narrativo chamaron a nosa atención. Tamén  sinalamos o  curioso que nos pareceu que a historia  se desenvolva en tan só en vinte e catro horas e como este feito lle dá un ritmo especial á narración.

                                                                                                                     Fendetestas de 2º ESO

GUÍA DE USUARIAOS DA PLATAFORMA DE LIBROS DIXITAIS

Como sabedes, os membros do Club de Lectura Fendetestas sodes usuarios da plataforma de libros dixitais integrada no proxecto piloto ELBE 2, no que participa o noso IES. Velaquí unha guía de usuario elaborada polo equipo de biblioteca para facilitar o voso manexo deste marabilloso recurso. Non dubidedes en acudir a ela cando aparezan as dúbidas...

ENCONTRO LITERARIO CON HÉCTOR CAJARAVILLE

        

       O pasado martes 8 de maio visitounos o escritor Héctor Cajaraville. No encontro falamos de dous libros que o alumnado de 4º ESO  e  de 3º ESO do  Clube de Lectura Fendetestas leu este curso: O segredo da casa de Formoso e  A caixiña dos rancores.

Dúas alumnas, Iria Bergantiños e Sabela Núñez, presentaron o acto facendo unha pequena introdución. Nesta resumiron a biografía e bibliografía do escritor, así como os galardóns que obtivo, entre os que destaca o Premio Xerais no ano 2015 pola obra  De remate.

O autor comezou falando sobre as razóns que o impulsaron a escribir e como se foi  apartando da súa profesión orixiaria, o xornalismo. Aínda que manifestou que a súa verdadeira vocación era, sen dúbida, a de escritor, tamén deixou claro que o xornalismo contribuíu a enriquecelo como creador. Todos quedamos sorprendidos ao coñecer a rapidez coa que o autor dos libros que leramos os escribira, feito  relacionado coa inmediatez coa que se lle requiría a entrega dos artigos xornalísticos.

Máis tarde convidounos a formularlle preguntas que fosen do noso interese sobre os seus libros, personaxes, inspiracións, aspiracións...  As preguntas foron moi diversas e as súas respostas moi interesantes. Soubemos que os dous libros tiñan outros títulos diferentes orixinalmente e como mesturaba lugares reais e ficticios nas súas narracións. Ademais descubrimos que se inspirou na súa nai ao crear a personaxe de Chiruca, á que el considera a verdadeira protagonista de A caixiña dos rancores. Comentou a importancia de dous dos temas sobre os que xiran as novelas: a memoria histórica e os casos de bebés roubados. Tamén nos falou de cuestións máis persoais como  a súa principal afección, o atletismo. Contounos que para el era un soño de infancia ser un atleta de elite.

A xeito de  conclusión, deberiamos destacar a proximidade que o autor mantivo durante todo o encontro, conseguindo achegarnos á actividade da creación literaria. Ademais demostrounos que é un home moi expresivo e polifacético, que loitou  por cambiar unha profesión que lle resultaba  insatisfactoria pola súa verdadeira aspiración.  Rematamos dándolle as grazas polo seu tempo e pola súa amabilidade!

                                                                                           María Couceiro (3º ESO B)

ESCOITANDO O ESCRITOR