O neno can é un fermosísimo e conmovedor libro
de relatos de Fina Casalderrey e Francisco Castro que nos fai reflexionar sobre as tremendas inxustizas do mundo actual. Cinco contos que
teñen en común a presenza dun can que vai acompañando a estes pequenos
protagonistas da insolidariedade, da miseria, da falta de igualdade e de oportunidades, da explotación… Unha
oportunidade para enfrontarnos a unhas realidades difíciles de dixerir que nos
lembran que hai moitas historias fóra do noso medio (e tamén nel) que nos sacan
as cores como integrantes da sociedade civilizada que se supón que
constituímos.
Os rapaces e
rapazas de 1º ESO que lemos
O neno can definimos o libro
de moitas maneiras diferentes, pero todos estivemos de acordo en cualificalo
como triste. As historias de Aakesh, Nadim, Kai, Leila e Carlos gustáronnos
moito pero resultáronnos conmovedoras e
desacougantes. Cada un dos contos do libro vai encabezado por unha frase na que
se nos lembra un dos dereitos dos nenos relacionado coa temática do relato en
cuestión. A lectura deste libro fíxonos
reflexionar sobre tantas inxustizas que
se cometen no mundo e decatarnos do
afortunados que somos por vivir onde vivimos.
Cando estamos a
piques de conmemorar o Día da Paz, estaría ben lembrar que debería ser posible
un mundo mellor.
No hay comentarios:
Publicar un comentario