Unha vez máis recibimos a visita do escritor Carlos Negro no noso centro. Nesta ocasión agasallounos coas súas poesías e fíxonos reflexionar sobre o poder comunicativo que posúen as palabras. Os libros escollidos para a primeira sesión do encontro foron Makinaria e Penúltimas tendencias.
A lectura de Non cantan paxaros neste bosque foi o punto de partida para intercambiar impresións co autor sobre os personaxes e as desacougantes historias. Tamén compartiu con nós o seu gusto pola temática do misterio realizando un interesante percorrido pola literatura universal.
O encontro literario con Carlos Negro desenvolveuse nesta
ocasión na biblioteca de xeito virtual a través de videoconferencia. Gardando a distancia de seguridade necesaria
diriximos as nosas miradas a unha pantalla instalada diante dos andeis que
conteñen os libros. Comezamos cunha pequena presentación realizada por María
Conde e Ariadna Fernández para pasarmos despois a escoitar poesías na voz do
autor.
Falounos da importancia deste xénero literario para conseguir
entendernos mellor a nós mesmos e da capacidade que as palabras teñen para
interpretar a realidade. Fixo fincapé en que a poesía non ten por que resultar
seria e aburrida. Para demostrárnolo, leunos uns poemas dunha autora valenciana
e, a continuación, un de Fran Alonso. A
continuación, pasamos a centrarnos nas
súas obras e fixo unha selección de poemas deMakinaria, Masculino singular, Penúltimas tendencias e Aplicación
instantánea. Reflexionamos con el sobre os perigos da condución
irresponsable, os estereotipos de xénero, a masculinidade tradicional, o
necesario feminismo...Foi moi interesante escoitar por boca do autor os textos
que nós leramos previamente, acompañados dunha posta en escena moi particular
na que colaboramos todo o que a distancia nos permitiu.
Despois puidemos formularlle varias
cuestións sobre aspectos concretos da obra e dos seus inicios como
escritor. Tamén lle preguntamos polas súas influencias literarias e os seus
gustos lectores.Animounos a ler poesía
ata atopar a obra ou o autor ou autoraque nos “dixese algo”. Lembrounos que a poesía non é unha ciencia exacta
e, o que a un lle resulta indiferente para outro pode supoñer unha mensaxe moi
relevante e transcendental. Falounos de como os acontecementos históricos máis
importantes para unha persoa poden ser tan íntimos e exclusivos comoo falecemento dun ser querido. E cada un ten
que buscar a súa historia nesa poesía que está escrita ou por escribir...
Moitas grazas, Carlos pola túa
amabilidade, atención e dedicación coa que contestaches ás nosas preguntas.
Agardamos verte axiña en persoa no noso centro!
Mentres agardamos o encontro do próximo mércores con Carlos Negro (Semana Cultural), seguimos compartindo as creacións realizadas tomando como base a lectura dos seus poemas.
Nesta ocasión, Ariadna Fernández e Nuno Couso ofrécennos, respectivamente, as súas interpretación de Masculino singular e Penúltimas tendencias.
Nas últimas semanas tivemos entre as mans dous dos poemarios de Carlos Negro, Makinaria e Penúltimas tendencias. A través deles os fendetestas de 3º da ESO atoparon unha nova visión da poesía, próxima na linguaxe e nos contidos.
Aquí vos deixamos dous vídeos e unha recensión sobre as obras, elaboradas por Elena Naveira, Nadia Fernández, Mateo Sánchez, Juan Conde, Marín Pérez e María Couceiro.
Makinaria é, sen dúbida, un libro rechamante e pouco común entre a poesía. Incluíndo palabras malsoantes e tópicos moi comúns entre os adolescentes, achégase a nós , en concreto aos que estudan automoción, e fainos recapacitar sobre os perigos que podes correr se es impulsivo nesta difícil etapa da túa vida.
Do mesmo xeito que Makinaria, Penúltimas tendencias mergúllanos no mundo adolescente, pero en concreto no feminino. O autor móstranos unha moza que quere saír dos tópicos e as formas estándar. Así, no libro exprésanse, con enxeñosas rimas pouco comúns, as opinións e sentimentos dela, ademais da reivindicación da súa liberdade e dereitos. A obra ofrécenos unha visión da vida desde o punto de vista da mozas: tes que ser como queiras ser ti, non como queiran os demais que ti sexas.
.jpeg)
