PRIMEIRAS LECTURAS

 

     Un curso máis iniciamos a nosa andaina a través das lecturas.  Este ano, o noso club está formado por máis de 70 rapaces e rapazas e 7 profesoras distribuídos en 12 grupos. Arrincamos  con variadas opcións lectoras. En 1º da ESO comezaron cun clásico da banda deseñada por partida dobre: Asterix y compañía e Astérix e os Xogos Olímpicos; lecturas que  combinarán con  O agasallo de Anya.  Os  Fendetestas de 2º andan entre o misterio de As fronteiras do medo e as conmovedoras historias de Tristes armas e Os nenos da varíola. En 3º, vanse repartir entre un  marabilloso clásico  universal como  Drácula e  a terrible historia sobre a explotación infantil narrada en  La  música del viento. Os lectores de 4º verán a cara máis cruel do nazismo con Enderezo descoñecido. En 1º  Bach  optarán por unha divertida comedia: El médico a palos.  Os Fendetestas de Inglés visitarán as terras de Irlanda e Escocia a través de All about Ireland e All about Scotland.

    Lembrade revisar os calendarios  que están na porta da aula do Club de Lectura e na entrada da biblioteca para non esquecer as convocatorias das reunións.

NOVO CURSO, NOVAS LECTURAS

 

Iniciamos este particular curso adaptándonos á nova normalidade determinada pola pandemia que condiciona as nosas vidas dende o pasado mes de marzo. Antes do coronavirus as reunións do noso club desenvolvíanse na sala anexa á biblioteca arredor dunha mesa onde intercambiabamos impresións. Esa mesa redonda, en torno á cal tantas lecturas compartimos e debatemos,  tivo que ser retirada para cumprir o protocolo de distancia social necesario para evitar os contaxios.  Habilitamos, coa axuda da dirección do centro, un novo espazo de reunión nunha aula de desdobres. Alí tentamos crear un ambiente agradable que favoreza a comunicación e que asocie a lectura coa actividade lúdica e pracenteira que é.

 

As lecturas coas que iniciamos o curso son moi plurais e variadas. Deste xeito, incorporamos  itinerarios diversos que van dende a inclusividade e a integración social, pasando polo misterio ou a novela histórica, ata a crueldade da guerra ou da marxinación á que se ven sometidos os nenos e as mulleres nalgúns lugares do mundo.  A continuación, a nosa proposta para este trimestre:

Os novos membros do club  de 1º ESO comezaron a lectura de Wonder de R. J. Palacio co proxecto de complementala coa proxección da longametraxe. Ao tempo, outros compañeiros do mesmo curso internaranse polos camiños do misterio con El príncipe de la niebla de Carlos Ruíz Zafón e da novela histórica con El herrero de la luna llena de María Isabel Molina. Un dos grupos de 2º ESO está atrapado na apaixonante historia de O corazón de Xúpiter de Leticia Costas. Outros optaron pola  novela Tristes armas  de Marina Mayoral co obxectivo de coñecer un pouco mellor as  terribles circunstancias que sufriron moitos nenos e nenas na guerra civil. Compartirán esta lectura coa versión adaptada de Anaya do clásico Romeo y Julieta.

 Khaled Hosseini foi o autor escollido por varios dos veteranos do club: os integrantes de 3º ESO andan a voltas con Mil soles espléndidos e en 4º comezaron a ler a novela gráfica baseada na obra Cometas en el cielo. Dúas historias impresionantes e conmovedoras que os farán reflexionar moito sobre as desigualdades existentes no mundo.

Os grupos de Inglés mergullaranse nos costumes e  tradicións das culturas de Irlanda e Escocia con All About Ireland e All About Scotland de Emily Winston. Marabillosa forma de viaxar e coñecer outros mundos a través da lectura!

Para profundar máis na relación entre literatura e cinema o alumnado de bacharelato lerá Los girasoles ciegos de Alberto Méndez e asistirá á proxección da versión cinematográfica de José Luis Cuerda.

LEMOS...

     

     Damos conta das novas lecturas escollidas para botar a andar o Club de Lectura Fendetestas un ano máis.

     Un dos grupos dos membros máis novos do Club de Lectura comezou mergullándose no mundo da banda deseñada a través de  Obelix e compañía de R Goscinny e A. Uderzo. Outro dos grupos de 1º preferiu adiantar o Samaín da man de Concha López Narvaez con La sombra del gato.

      A temática do misterio tamén foi a seleccionada como primeira lectura por un dos grupos de 2º ESO: Relatos escalofriantes de  Roald Dahl. O outro grupo decantouse por dar continuidade a un autor que colleitou grandes éxitos cursos anteriores coa famosa obra O neno do pixama a raias. Falamos de John Boyne  e do seu último achegamento á época dos nazis e do holocausto xudeu:  El niño en la cima de la montaña.

     A cruel temática da 2ª guerra mundial tamén centrará as lecturas dos dous grupos de 3º ESO que optaron unanimente por Enderezo descoñecido de Kressman Taylor.

     Os Fendetestas de 4º ESO combinarán a lectura  da novela de María Solar Os nenos da varíola co clásico de Agatha Christie Asasinato no Orient Express.   Na sección de Inglés as obras seleccionadas foron  The curious case of Benjamin Button de F. Scott Fitzgerald para 4º ESO e  Brave new world de Aldoux Huxley para 1º de bacharelato.

     Os máis veteranos do club  están lendo Mundo Extraño de José Ovejero, autor que visitará o noso centro no mes de novembro para manter un encontro literario centrado na obra nomeada. 

     Un total de dez títulos repartidos entre 55 ávidos lectores e lectoras (aproveitamos para dar a benvida ás incorporacións de última hora) que compartirán con sete profesoras o pracer da lectura  e da adquisición de coñecementos.

 

 

ESTAMOS A LER...

           Iniciamos curso introducíndonos de cheo no Samaín e  deixándonos levar pola maxia do misterio. Comezamos coa lectura dun clásico da literatura universal: Frankestein de Mary Shelley   (1º da ESO) e cunha selección de As fronteiras do medo de Agustín Fernández Paz  e dos inquietantes contos que Xosé Miranda nos ofrece en As mans do medo (2º da ESO). Os membros máis novos do noso club completan lectura inicial co relato  “Las babuchas fatídicas” extraído de Las  mil y una noches.

Os rapaces e rapazas de 3º da ESO mergulláronse na lectura de dúas obras que colleitaron grandes éxitos no noso club: Clara dice de Carlos Roncero e El niño en la cima de la montaña de John Boyne. Os perigos das amizades a través de  Internet e a vulnerabilidade dos adolescentes ofrecerán, sen dúbida, moitos temas de conversa nas sesión de análise da obra de Roncero.  O libro de Boyne (autor de O neno do pixama a raias) transportaraos á época da 2ª Guerra Mundial,  deixando unha desacougante visión sobre os perigos das ideoloxías.

            

           Un dos grupos de 3º da ESO de Cultura Clásica están a ler  Ana y la Sibila de Antonio Sánchez Escalonilla. Este libro  narra a historia dunha rapaza chamada Ana que, mentres contempla fascinada os frescos da Capela Sixtina, recibe una chamada de auxilio da Sibila de Cumas. A partir de aquí, a protagonista, co seu compañeiro Mario e coa axuda do gardián do edificio viaxarán ao pasado para intentar liberar a Sibila do seu horrible destino: vivir mil anos. Outra das lecturas  propostas para este  grupo é  Metamorfosis de Ovidio, un libro que relata historias míticas nas que os protagonistas se transforman en árbores, animais, rocas... Nelas, o autor intenta, en xeral, mostrar as debilidades do ser humano.

           Os Fendetestas de Francés  entrarán de cheo na maxia dun clásico da literatura universal: Le Petit Prince de Antoine de Saint-Exupéry. O amor, a amizade e o sentido da vida son algunhas das reflexións que contén esta fermosa historia que engaiolou e engaiola a lectores de todo o mundo.

Para rematar esta toma de contacto, os rapaces e rapazas de 4º da ESO e 1º de Bacharelato comezaron a lectura dunha fermosa historia que os vai facer meditar sobre a cruel realidade dos exiliados: A neta do señor Linh de Philippe Claudel.