A lectura da versión en banda deseñada de Cartas de inverno despertou moito entusiasmo entre os Fendetestas. Esta novela gráfica de Antón Seijas está baseada no libro de Agustín Fernández Paz.
Aínda que non todos somos incondicionais da temática do misterio, a verdade é que estivemos de acordo en destacar o interesante e entretida que nos resultou esta obra. Comentamos que hai moitos elementos que dan medo; unha das partes máis desacougantes é cando a rapaza debuxada nun gravado se modifica ao abrir o libro que o contén. Tamén nos decatamos que produce máis temor o descoñecido que o que está perfectamente identificado. Por iso, parécenos que o autor optou por non aclarar totalmente o final. Así, nós pensamos máis, traballamos a imaxinación e iso fai que a historia sexa aínda máis inquietante.
Chamounos a atención a calidade dos debuxos e como o autor xoga cos diferentes tipos de letra.
En definitiva, gustounos moito a todos, e parécenos un libro moi recomendable para os afeccionados á temática do misterio e á banda deseñada.
No hay comentarios:
Publicar un comentario