QUEN TIVESE FLORES RADIACTIVAS!

      Hoxe rematamos, outro grupo de Fendetestas de 1º de ESO, a lectura de As flores radiactivas, de A. Fernández Paz. Temos que dicir que non conseguimos que nos enganchara coma outros libros que lemos este curso...

CEMITERIOS DE RESIDUOS RADIACTIVOS

        Na tertulia falamos sobre os temas da obra, ben actuais, por certo: O ECOLOXISMO E A IMPORTANCIA DE QUE HAXA ENERXÍAS ALTERNATIVAS (vaia barbaridade se fixo coa Fosa Atlántica, verdade?), O PACIFISMO E A NECESIDADE DE SOLUCIONAR SIN FORZA NIN VIOLENCIA OS PROBLEMAS (o exército ten, a día de hoxe, outras funcións tan importantes como a puramente militar; de feito, as labores humanitarias son unha tarefa que desempeña con frecuencia), O VALOR DA INICIATIVA PERSOAL na vida, O AMOR...

   Para rematar, falamos do papel dos SÍMBOLOS na literatura: cando o escritor quere crear un argumento en torno a valores ou ideas abstractas, recorre con frecuencia a eles, materializando o inconcreto en seres ou elementos perceptibles da realidade. A. Fernández Paz emprega AS FLORES RADIACTIVAS para mostrar o DESEXO DE PAZ; Mary Shelley creou o monstro de Frankenstein para concienciar aos lectores do PERIGO DA AMBICIÓN DESMEDIDA E IRREFLEXIVA; moitos superheroes que coñecemos tamén son símbolos: Spiderman e Superman son a MAN QUE AXUDA, a SOLIDARIDADE, a PROTECCIÓN...

LENDO A AGUSTÍN FERNÁNDEZ PAZ

 Os Fendetestas de 1º ESO despois de comentar O laboratorio do doutor Nogueira (libro proposto  neste trimestre na materia de Lingua e Literatura) estivemos decidindo que lectura escoller para comezar estas vacacións. Moitos  quedamos con ganas  de saber máis sobre  Agustín Fernández Paz porque nos chamou moito a atención o feito de que aparecese como personaxe no libro. Como escoitamos varios comentarios de compañeiros aos que lles gustaba moito este autor, pareceunos que unha boa maneira sería ler algunha outra obra del. Barallamos diversas posibilidades,  e ao final a escolla foi variada: a maioría eliximos Trece anos de Branca, pero hai que dicir que  a algúns pareceunos que As flores radiactivas  tamén trataba un tema moi interesante. Por iso decidimos quedar con esa dobre opción de lectura.

 As temáticas das dúas obras son ben diferentes, se ben teñen en común o feito de ter sido escritas por un dos escritores máis recoñecido e premiado da nosa literatura. Á volta de Semana Santa daremos conta das nosas impresións sobre estes dous libros.