AS FRONTEIRAS DO MEDO

       
      Elaboradísimo booktráiler de Nadia Fernández sobre o libro de Agustín Fernández Paz. Quen se atreve a mergullarse nestas misteriosas historias?

A PORTA DO ALÉN

 Os Fendetestas de 2º  ESO comezamos o curso cunhas lecturas terroríficas: a primeira foi “A porta do alén” relato incluído no  libro As fronteiras do medo de Agustín Fernández Paz. Nas sesións que tivemos para comentar o conto e intercambiar impresións falamos  da noite do Samaín e  relacionámola   co Halloween e  coa crenza de que nesa noite máxica os mortos compartían espazo cos vivos (por iso en moitas casas  se pon  a mesa para os defuntos da familia). Isto chamounos moito a  atención, pero o que máis nos sorprendeu a todos foi o final do conto que nos pareceu moi logrado e totalmente desacougante. Tamén sinalamos que o autor consegue crear unha intriga (adictiva) que vai medrando ao ir avanzando na lectura ata chegar a ese final inesperado.  Outra cuestión que nos interesou foi o tema da inmortalidade;  lembrounos unha serie que se emitiu este verán na televisión que se chamaba Forever.  Está claro que o Máis Alá  e a relación entre a vida e a morte son temas   que a todos nos interesan aínda que nos dan un chisco de respecto.

Non vos contamos máis; é unha lectura que recomendamos a todos os que lles guste o misterio e as historias sobrenaturais. E falando de ler e de gustar, ímosvos contar por que nos gusta ler a nós:

  

Sabela: Ler reláxame moito, fomenta a miña imaxinación e tamén me axuda a conciliar o sono.

 Mario: Leo porque me gusta moito o misterio e  me estimula para aprender cousas novas.

Juan José: A lectura  ábreme a porta a un mundo onde imaxino cousas surrealistas.

Iago: Gústame ler porque despois teño soños moi fermosos.

Ángela: Leo porque así non penso.

Laura: Atráeme a lectura porque me leva a mundos diferentes.

Christian e Diego: Lemos para non aburrirnos.

Raúl: Leo porque me distrae doutras cousas que non me gustan, por exemplo, os exames.

Leonardo: A lectura relaxáme moito e iso agrádame.

Begoña: Gústame ler porque a través dos libros podo coñecer historias doutras persoas, culturas… 

E,  vós... por que ledes?

AS FRONTEIRAS DO MEDO

Os lectores máis novos do club de lectura Fendetestas pechamos o curso cunha reunión na que comentamos o relato " A porta do alén" de Agustín Fernández Paz incluído en As fronteiras do medo. A primeira lectura deste curso tamén foi un conto deste libro, concretamente "O enigma do menhir". Este autor foi un dos que máis nos gustou de todos os que lemos dende que comezamos no club de lectura.

Nesta última reunión comentamos este relato e falamos do Samaín e das historias de medo. A verdade é que non todos tiñamos o conto lido, porque con tantos exames...

Tamén falamos do club de lectura e da nosa experiencia ao formar parte del. Case todos dixemos que pertencer ao club axudounos a entender mellor as lecturas e a aclarar moitas dúbidas. Tamén destacamos que foi moi interesante escoitar os comentarios dos compañeiros e compañeiras e as recomendacións de libros que lles gustaran. Descubrimos que temos gustos lectores bastante diferentes: a uns gústanos máis a temática de misterio e a outros os libros con protagonistas da nosa idade e aos que lles pasen cousas coas que nos poidamos identificar.

 Bo verán a todos e felices lecturas!