A pantasma da guerra volve, por desgraza, a estar de plena actualidade. O libro de Philippe Claudel ofrécenos un fermoso e cruel relato sobre as consecuencias dos conflitos bélicos. Dous booktrailers realizados por Pablo Astray e Gloria Iglesias animan á lectura deste libro convertido xa nun clásico imprescindible no noso club de lectura.
A novela de Philippe Claudel
preséntanos unha historia que pode ter varias lecturas: por un lado a traxedia
dos refuxiados ou fuxidos das guerras e, asemade, a das persoas que se senten soas e que buscan
desesperadamente un motivo polo que vivir.
O señor Linh chega a un país indeterminado
fuxindo dunha guerra que tampouco se especifica. A historia non ten relevancia
como un feito concreto senón que pretende recoller a universalidade do
sufrimento, xa que, tal e como o propio
autor a define, a novela é “ un canto universal á tolerancia”.
Son moitos os temas que aparecen ao
longo das páxinas: o exilio, a soidade,
a vellez, a loita pola propia
identidade, a supervivencia, a amizade, a bondade...
A neta que o acompaña no exilio simboliza
a identidade, o vínculo co pasado que lle foi arrebatado e, ao tempo, o futuro
esperanzado, o desexo de recuperar as ganas de vivir.
Unha novela moi especial cun final
sorprendente, a partir do cal todo adquire un significado e unha interpretación
diferente. Merece, sen dúbida, unha relectura onde se observan eses pequenos
detalles que na primeira pasan desapercibidos.
Martina, Candela, Karla, Selma e Lucía
Un dos libros xa clásicos no noso Club é A neta do señor Linh. Ano tras ano repetimos a súa lectura coa seguridade de que a realidade cruel da guerra e as súas terribles consecuencias servirán para decatarnos das dimensións humanas que teñen estes conflitos. Cando os lectores de 4º da ESO escolleron esta obra non comezara a guerra en Ucraína que actualmente conmove ao mundo coas imaxes dos bombardeos e dos refuxiados. Por desgraza, a guerra non é un episodio da historia dun pasado máis ou menos remoto. A crueldade do conflito é unha realidade do noso presente e asistimos como espectadores a historias de traxedias familiares que poderían pasarnos a calquera de nós. Resulta impresionante ver como persoas inocentes e totalmente alleas aos intereses políticos ven alterada a súa vida e teñen que abandonar as súas casas e, ás veces, a parte da súa familia.
Con este terrible contexto de fondo do cadro a lectura da obra de Philippe Claudel resultounos tremendamente conmovedora e máis actual ca nunca. Todos estivemos de acordo en resaltar a orixinalidade da historia e o sorprendente desenlace. A coidada narración, atendendo ao mínimo detalle, fai que despois de chegar ao final nos decatemos de que todas as pezas encaixan. É, sen dúbida, un libro para volver a ler cunha nova visión e atendendo a eses pequenos detalles que nunha lectura inicial poden pasar desapercibidos.
Rematamos destacando que este libro é un canto á esperanza é á capacidade do ser humano para volver a inventarse a pesar das adversidades. A amizade e a solidariedade poden ser unha axuda para volver a atopar un sentido á existencia ante tanta destrución.
Nerea Varela, Laura Vázquez, Julián Merelas, Laura Bermúdez e Enzo García (4º ESOI)
A neta do señor Linh é unha novela xuvenil de Philippe Claudel, docente e escritor francés, autor de varias novelas, como As almas grises e O informe Brodeck. Tamén escribe relatos, ensaios e guións de cine e televisión, como a película Hai moito tempo que te quero, da que é guionista e director.
O señor Linh abandona a súa terra xunto á súa neta Sang Diu, e tras semanas de viaxe en barco, chega a un país, posiblemente Francia, onde non coñece a ninguén, e tampouco a lingua que se fala. Ambos, son levados a un piso de acollida, do que o ancián nunca sae, ata que unha mañá decide facelo. É aí cando coñece ao señor Bark, que senta xunto a el nun banco, e lle fala mentres fuma un cigarro, a pesar de non entenderse. Esta situación repítese, ata formarse unha rutina que os leva a unha bonita amizade. O señor Bark, o señor Linh e Sang Diu pasan todas as tardes xuntos, ata que un día, os servizos sociais levan a estes dous últimos a un hospicio o cal non está autorizado a abandonar. Pero o valor e a determinación do ancián lévano a un inesperado e conmovedor desenlace.
Como podemos observar, esta fábula trata principalmente o exilio e a soidade, pero tamén aborda outros temas secundarios como a amizade e a bondade.
Tamén, cabe destacar ao personaxe do señor Linh, un ancián que escapa da guerra, motivado por darlle a unha mellor vida á súa neta Sang Diu, que realmente é unha boneca, xa que a neta está morta. O feito de que el non vexa esa realidade, pode recordarnos ó personaxe de Don Quixote, xa que ambos teñen unha loucura, que os leva a unha realidade paralela, polo que só ven o que a súa mente lles permite. Por outra parte, o señor Linh tamén é loitador, valente e bondadoso.
Persoalmente, creo que esta fábula é moi boa, xa que mostra as graves consecuencias dunha guerra, e como ás veces só necesitamos ser escoitados por alguén. Creo que o que máis me gustou é que Sang Diu sexa en realidade unha boneca, xa que ao finalizar a obra, o lector dáse de conta de que durante toda a obra houbo indicios deste feito, pero que quizais pasaron desapercibidos para nós; polo que se a volvésemos ler, veríamos que hai coma dous relatos, o que ve o señor Linh, fronte á realidade.
Recomendaríalla a calquera persoa, xa que a pesar de ser para un público xuvenil, creo que podería ser axeitada para todas as idades, xa que nos ensina que debemos ser bondadosos, e loitar sempre para ter unha vida mellor.
NURIA GÓMEZ (1º BACH A)
