15 jun. 2018

OS NENOS DA VARÍOLA


     O libro Os nenos da varíola, da escritora galega María Solar, recrea a través da ficción a expedición médica  que trasladou  a vinte e dous nenos ata América  co obxectivo de  levar a vacina da mencionada enfermidade.


      A historia relatada xira en torno a dous nenos orfos (expósitos) Ezequiel e Clemente. Precisamente no hospicio da Coruña  é onde se sitúa boa parte da trama ambientada a comezos do Século XIX, concretamente no ano 1803. A autora humaniza a historia e consegue que o lector se identifique non só cos nenos, senón tamén co ambiente  de precariedade e necesidade. Ao longo da narración van xurdindo historias paralelas que lle outorgan un sentido engadido. Cando xorde a necesidade de  atopar nenos que poidan trasladar a vacina da varíola nos seus corpos acoden aos pequenos expósitos  e iso leva consigo a potencial separación dos rapaces. Ezequiel encarna unha serie de valores positivos como son a solidariedade, a capacidade de esforzo, a ansia de superación... É interesante ver como o ambiente determina as accións dos pequenos e como son tremendamente vulnerables e influenciables. Pero, sen dúbida, o personaxe máis determinante é o de IsabelZendal. Esta  muller, natural de Ordes e procedente dunha humilde familia, foi a primeira enfermeira galega coñecida. Pasou á historia pola súa intensa e relevante   colaboración  na  misión de levar a vacina a América. Por este feito o seu nome  pasou a formar parte da memoria colectiva hispanoamericana.  Ademais foi recoñecida pola OMS no ano 1950 como a primeira enfermeira da historia en misión internacional.

         Isabel Zendal constitúe un dos piares básicos da narración. É un personaxe moi ben construído, que evoluciona ao longo da historia. Ademais chama a atención que desafía as regras convencionais da época, xa que tiña un fillo de solteira e  desempeñaba o cargo de reitora nun centro relixioso aínda que ela non o era. Pódese dicir que foi unha verdadeira pioneira xa que era moi inusual que unha muller exercese un cargo de responsabilidade.  Outros personaxes relevantes son o  alacantino  doutor Balmis (organizador da expedición),  o betanceiro doutor Posse  (colaborador) e, por suposto, os  nenos que aparecen acreditados nesta historia cos seus nomes e apelidos e que,  ao igual que  os restantes membros da expedición, foron reais. 





      A lectura deste libro resultou todo un éxito. Nas sesións dedicadas ao comentario recoñecemos e valoramos o traballo de documentación e investigación levado a cabo pola autora. A ambientación está tan coidada que parece trasladarnos á época  en que se sitúa a historia.  A recoñecida escritora engade con este libro un valor importante á súa significación no panorama literario  e cultural galego.  

       Unha marabillosa e conmovedora ficción baseada nun feito real de relevancia histórica. Moi recomendable!

                                     Raúl Gónzález, Lucía Vigo e Cristian Morandeira

14 jun. 2018

CUPIDO E PSIQUE




Os fendetestas de 3º Eso do Club de lectura de Cultura Clásica vimos de ler neste terceiro trimestre un dos relatos mitolóxicos máis influíntes da cultura occidental: a fermosa fábula de "Cupido e Psique", recollida na novela de Apuleyo titulada O asno de ouro ou Metamorfosis. Trátase da única novela latina que chegou íntegra ata os  nosos días.


A continuación, deixámosvos o traballo que fixemos sobre esta lectura.





7 jun. 2018

LA GUERRE DES BOUTONS




Os Fendetestas de Francés leron neste último trimestre o libro de Louis Pergaud La guerre des boutons e queren compartir algúns coñecementos que lles proporcionou esta lectura.


No tocante ó autor Louis Pergaud, naceu en Belmont, no leste de Francia, o 22 de xaneiro de 1882. O seu pai era profesor. Pergaud morreu o 8 de abril de 1915, en plena Primeira Guerra Mundial (a guerra do 14-18). Dispáranlle na fronte durante un ataque contra os alemáns. O seu corpo nunca foi encontrado.


Foi mestre e novelista. As súas dúas novelas máis coñecidas son Goupil à Margot, que recibiu o Premio Goncourt e La Guerre des Boutons, publicadas en 1910 e 1912 respectivamente.
Para escribir o seu libro, Louis Pergaud inspirouse nos recordos da súa contorna e nas batallas dos seus estudantes. Polo tanto, as dúas aldeas que se enfrontan entre si existiron realmente, pero no seu relato deulles outros nomes. E a confrontación entre os dous pobos tamén é auténtica! Unha das dúas localidades é Landresse. Está situada no departamento de Doubs en Franche-Comté.

No libro, cóntase a historia de dúas bandas de nenos de dúas aldeas próximas, Longeverne e Velrans, que protagonizan unhas batallas desapiadadas. Loitan con pedras, varas pero tamén con puños e pés. Lebrac é o líder da banda Longeverne e L’Aztec o da banda Velrans. Cando un neno é tomado prisioneiro pola banda oposta, os seus inimigos arríncanlle os botóns da súa roupa e lévanlle os cordóns dos seus zapatos. Unha das batallas memorables do libro é a das dúas cuadrillas que pelexan espidas para non estragar as súas vestimentass e especialmente para non ser castigados polos seus pais.


O libro obtivo éxito cando foi publicado e aínda o ten hoxe grazas ás películas de Yves Robert (1962), Yann Samuel (2011) e Christope Barratier (2011). Se queredes saber máis sobre o libro , invitámosvos a que o leades e vexades a película. Achegámosvos o tráiler da película en francés.


 

5 jun. 2018

PREMIOS LITERARIOS


      Nos últimos días foron varios os premios concedidos a autores  e autoras vinculados por razóns varias ao pequeno universo literario que conforma Curtisbiblio e o Club de Lectura Fendetestas.  

      Un dos  recoñecementos máis prestixioso das nosas letras é, sen dúbida, o Premio Xerais. Nas categorías de  novela, literatura xuvenil e literatura infantil   galardoou respectivamente a  Emma Pedreira por Besta do seu sangue, a Carlos Negro  por Aplicación instantánea (Premio Jules Verne) e a  Héctor Cajaraville por Kusuma de Héctor Cajaraville (Premio Merlín) de Literatura Infantil. Cumprirá agardar ata o mes de outubro para  a publicación das obras, momento no que se celebrará a cerimonia de entrega dos galardóns.  

    










                                                                                                                        Poucos días antes do fallo dos Premios Xerais celebrouse a Gala do Libro  Galego onde se premiaron  as mellores iniciativas editoriais do ano 2017.  Destacamos a A nena do abrigo de astracán  de Xabier P. Docampo que recibiu o galardón  á mellor obra de narrativa e  Os nenos da varíola  (un éxito total no noso club de lectura) de  María Solar escollido como mellor libro xuvenil. Mención especial merece a poeta de Fisteus, Lupe Gómez, que recolleu o premio ao mellor libro de poesía pola súa obra Camuflaxe.




      Dende Curtisbiblio  e do Club de Lectura Fendetestas queremos manifestarlles os nosos parabéns a eses autores e autoras que consideramos, dalgunha maneira, un pouco nosos. Moitos deles formaron parte das nosas  propostas de lecturas ou mantiveron interesantes encontros literarios co alumnado. Grazas a todos e a todas!

2 jun. 2018

XI XORNADA DOS CLUBS DE LECTURA


      Un ano máis o Club de Lectura Fendetestas estivo presente na undécima edición das Xornadas que reuniron en Compostela aos  coordinadores  dos 231 Clubs  espallados pola xeografía galega.
      O día  comezou coa entrega  do premio de Clubs de Lectura 2018 a Carlos Negro, como recoñecemento por ter sido o autor galego más lido polas lectoras e lectores  no pasado curso escolar. O autor de Makinaria, Penúltimas tendencias e Masculino singular reivindicou a importancia da poesía nos clubs de lectura  facendo fincapé na presenza desta nos elementos máis cotiás.  Tamén destacou o papel fundamental que desempeñan as bibliotecas  na dinamización dos centros de ensino e da sociedade en xeral, e como estas deixaron de ser meros almacéns de libros para converterse en viveiros de creatividade. 


     
      A seguinte actividade foi unha mesa temática relacionada coas estratexias para a selección de textos. Resultou moi interesante e enriquecedor coñecer  a experiencia doutros grupos de dinamización  en canto  a lecturas, propostas de organización, itinerarios temáticos...Posteriormente  Freddy Gonçalves compartiu cos asistentes a súa experiencia como promotor da lectura ofrecendo  ideas e suxestións de actividades para desenvolver nos clubs.
     Na sesión da tarde a oferta de actividades diversificouse en diferentes obradoiros e propostas temáticas diversas. No Club de lectura Fendetestas optamos por asistir ao taller Proxecto Eva conducido por Freddy Gonçalves, onde tivemos que construír unha sociedade ideal despois dunha catástrofe mundial. As referencias a coñecidas distopías literarias como O conto da criada ou Os xogos da fame foron as bases desta interesante proposta.


     Rematamos a tarde co achegamento de Dores Vilavedra sobre a necesidade de realizar unha selección meditada das suxestións lectoras e unha proposta de textos pouco convencionais. A clausura correu a cargo do polifacético Xurxo Souto que, coa posta en escena baseada na súa obra  Contos no mar de Irlanda, constatou unha vez máis a idea de que a literatura non só está nos libros.