8 may. 2019

PEL DE LOBO


     Os rapaces e rapazas de 3º ESO  escollemos como lectura para o terceiro trimestre a obra Pel de lobo de Xosé Miranda.
      A xeito de resumo podemos dicir que esta breve novela conta a historia dun rapaz duns dezasete anos chamado Xosé (que é o narrador) o cal se dirixe co seu pai á casa dun fidalgo para dar caza a uns lobos que ameazan unha aldea de O Incio. Na casa do señor coñecen as súas fillas, Ana e Aurora, e enfróntase ás gadoupas dun animal que destaca pola súa intelixencia e  astucia.  

     Na sesión que dedicamos a comentar a obra foi precisamente este feito foi un dos que máis nos chamou a atención como lectores: a capacidade dos lobos para medir aos seus adversarios e decidir  o momento axeitado para o ataque. Tamén nos pareceu moi curiosa a  misteriosa personaxe chamada Rosa dos Chantos que era metade home e metade muller, dependendo da lúa. 



     A temática fantástica relacionada cos encantamentos e os lobishomes combínase nesta intrigante narración con varios temas que foron do noso interese. A sociedade da época na que se ambienta é moi tradicional e a relación entre o fidalgo e as súas fillas amosa claramente unha actitude machista e intolerante por parte do pai. Outro dos temas que aparece tratado na novela é o do sistema foral: rendas que moitos campesiños galegos pagaron durante séculos aos propietarios das terras que vivían a custa dos traballo alleo. Unha das fillas do fidalgo manifesta claramente a necesidade de superar esta situación e defende a abolición dos foros; pola contra, o pai (como fidalgo propietario) non chega a percibir a inxustiza do sistema.
     As impresións sobre o libro foron variadas. En xeral atrapounos polo intenso ritmo narrativo e pola temática. Destacou especialmente a trepidante acción que se desenvolve nos intentos de dar caza aos animais. Tamén  nos gustou moito o final  que uns consideraron feliz e outros matizaron como un pouco agridoce. Pero non imos desvelar a historia, só apuntamos que ten moito que ver coas relacións humanas e a incomprensión. Se queredes saber de que falamos, xa sabedes...

ENCONTRO LITERARIO


        O pasado luns recibimos no IES de Curtis a Andrea Maceiras nun encontro organizado polo Departamento de Lingua Galega e o Club de Lectura. Con ela puidemos conversar sobre dúas das súas obras máis coñecidas: Europa Express e O que sei do silencio.  
       Os rapaces e rapazas de 3º intercambiamos impresións coa autora sobre a primeira das novelas. Comezamos a sesión cunha presentación relacionada coa obra coa que nos explicou o que era un spin off (narracións que  derivan das obras orixinais, convertendo un personaxe secundario en protagonista). Contounos que a idea de narrar as vivencias duns rapaces que fan un percorrido por Europa en Interrail ao rematar 2º de Bacharelato tiña un certo compoñente autobiográfico. Falamos das amizades, das viaxes e dos perigos das drogas.  

Na segunda sesión, os Fendetestas de 4º ESO e 1º Bach conversamos sobre o acoso escolar e como a necesidade de integración social que todos temos pode facernos permitir determinadas condutas  ou comportamentos incorrectos. A escritora fixo que nos puxeramos na pel dos acosadores  para decatármonos de como todos podemos sentirnos identificados, en maior ou menor medida, con eles.  Ao igual que en Europa Express, a  autora fixo referencia ao feito de que a obra tomaba como base unha historia real que a impresionou especialmente.

Falamos da relación da literatura co cinema e compartimos impresións sobre determinadas lecturas e series que nos interesaron.  Comentounos que comezou escribíndolle contos á súa irmá pequena  e que se sentía especialmente identificada coa literatura infantil e xuvenil. 
        Resultou tamén interesante o percorrido que fixo arredor do proceso creativo e das fases previas á publicación das súas novelas: incidiu no tempo que leva darlle vida a unha idea para transformala nunha historia. Con posterioridade á redacción, sucédense unha serie de fases que moitas veces non son advertidas polo lector: correccións, elección do titulo, da cuberta, ilustracións...Ardua tarefa, polo tanto, a do escritor. 
Sen dúbida un encontro moi interesante e produtivo que nos fixo reflexionar sobre diversos temas. Queremos destacar que Andrea Maceiras nos conquistou coa súa simpatía e amabilidade e agradecémoslle  unha vez máis  o seu tempo e dedicación. 

3 may. 2019

ANDREA MACEIRAS